Geguritan

UNI

Uni
Sliramu aja wedi
Uni
Sliramu apa lali
Ing tengah-tengah sawah
Ing tebaning bulak sepi
Angin tansah
Setya nyangking iki
Kidung-kidung kamanungsan 
Kidung-kidung katresnan
Kang tansah urip 
Ing telenging karang padesan

Uni
Geneya ndadak nangis
Nangisi wewayangan
kang suwe kelakon
Nalika palawija lan pari-pari
Wis suwe klebu ngijon

Ah, ...
Saiki wis ora mangkono uni
Kemakmuran iki diatur dening panguwasa
Kang mestine iya adil
Adoh saka tumindak 
Gung ambeg degsiya

Uni
Lilakna was sumelang kang nggandul ati
Uni
Sliramu apa lali
Jaman iki 
Wus tumuli  wiwit tangi
Ngumandhangake kidung-kidung kamanungsan 
Kidung-kidung katresnan

Mula uni
Mara gage
Ing dhadamu
Sumeten geni
Yakina
Wong cilik iki
Tansah cinaket ing Gusti

Geguritan Jawa

OWAH-OWAHAN JAMAN

Arit lan pacul wis suwe pensiyun

Kanggo mung kala kala

Yen pinuju kang duwe dhemen nenandur

Kembang-kembang pasren ing taman

Utawa mung kanggio cecawis

Yen ana tangga nyilih

Kanggo ngresiki got-got mampet

Lan arit kanggo mrapali pang-pang pager ijo

Supaya bisa semi ngrembaka ijo royo-royo

Garu lan luku wis suwe diringkes ditaleni

Disimpen ing pojokan omah pawon

Kebo sepasang kang mbiyen kanggo sabiyantu

Nggarap sawah wis suwe didol

Dianggep rendhet lakune 

Ditukokake kang luwih banter playune

Sawahe uga wis payu

Saiki papan padan pradesan wis gumebyar listrik

padhange kaya rina

Kang biyen tilas sawah garapan saiki didegake discotic

Hotel lan supermarket

Kang saben bengi rame gumerah suwarane

Ana kang jejogedan ngulat ngulet

Kaya wong kang lagi boyoke kruga krugel

Iki kahanan owah-owahane jaman

Sawah sawah wis ora ditanduri pari 

Nanging ditanduri beton

Undhuh undhuhane cicilan real estate

Dudu wit witan kang nukulake kembang

Nanging bank bank

Geguritan Jawa    :

PANJERITE BOCAH SEKOLAH

Pak Guru ,

Apa aran bocah keblinger

Yen ta aku klalen nggarap PR lan telat

Mlebu gerbang

Nganti nggawe layang prajanji

Ora bakal pisan mbaleni

Pak guru

Aku wis sinau

Wiwit jam pitu nganti jam telu

Isih dijejeli tugas-tugas liya

Maneka warna garapan saka buku

Adhuh, Pak guru

Apa isih kurang rekasaku

Yen saben mulih

Isih kudu les matematika, basa inggris, lan biologi

Uga les piano, ekstra karate

Sing prasasat ngrampog wektuku

Nganti ora cukup patlikur jam jroning sedina

Pak guru

Kanggoku caramu kliwat kaku

Saben dina aku kopenthelengi

Prasasat obah wae kleru

Uteg diubleg-ubleg

Nganti rambutku njegrik kaya paku

Pak guru

Marang sapa aku kudu sambat

Yen ta sabenere aku butuh dolanan

Ngundha layangan ing lapangan

Bal-balan karo kanca sabarakan

Nanging selawase

Pepenginan iku

Ora biso keturutan

Marga aku tuwa ing sekolahan

Pak guru...Pak guru...!